පස්වන කාර්මික විප්ලවය

පස්වන කාර්මික විප්ලවය: "මෙවලම්" යුගයෙන් "සහායකයින්ගේ" යුගයට

මීට වසර 250කට පමණ පෙර, ලෝකය වෙනස් වූයේ හුමාල එන්ජිමෙනි. එය පළමු කාර්මික විප්ලවයයි. මිනිසාගේ දෑතේ හයිය වෙනුවට යන්ත්‍රවල බලය ආදේශ විය. ඉන්පසු විදුලි බලය පැමිණියේය. එය දෙවන විප්ලවයයි; අඳුරු කම්හල් ආලෝකමත් වී නිෂ්පාදන වේගවත් විය. 1970 ගණන්වලදී පරිගණකය පැමිණ තෙවන විප්ලවය ඇරඹුනේ ලිපිගොනු සහ කඩදාසි වෙනුවට ඩිජිටල් තිර ආදේශ කරමිනි.

පසුගිය දශකය පුරාම අප කතා කළේ හතරවන විප්ලවය (Industry 4.0) ගැනය. අන්තර්ජාලය, ස්මාර්ට් දුරකථන සහ දත්ත (Data) මගින් ලෝකයම එකිනෙක සම්බන්ධ වූ යුගය එයයි. නමුත් 2026 වසරේ සිටින අපට දැන් පැහැදිලි වන සත්‍යයක් තිබේ. එනම්, ඒ "සම්බන්ධ වීමේ යුගය" දැන් අවසන් වෙමින් පවතින බවයි.

අප දැන් පය තබමින් සිටින්නේ මනුෂ්‍ය ඉතිහාසයේ දැවැන්තම පිම්ම වන පස්වන කාර්මික විප්ලවය (Industry 5.0) වෙතයි.

මෙය පෙර විප්ලවයන්ට වඩා හාත්පසින්ම වෙනස් ය. පෙර විප්ලවවලදී යන්ත්‍රවලට අප පැවසිය යුතු වූයේ "කළ යුතු දේ" (Command) ය. නමුත් මෙම නව යුගයේදී යන්ත්‍ර ස්වාධීනව "සිතා බලා තීරණ ගන්නා" (Intent/Autonomy) මට්ටමට පැමිණ ඇත.

මෙම විප්ලවීය වෙනස සරලව තේරුම් ගනිමු.

අණ දීම (Command) සහ අරමුණ (Intent) අතර වෙනස

පසුගිය වසර 50 පුරාම පරිගණක තාක්ෂණය ක්‍රියාත්මක වූයේ අපගේ විධානයන් මතයි.

පැරණි ක්‍රමය: ඔබට ලිපියක් ටයිප් කිරීමට අවශ්‍ය නම්, ඔබ Word විවෘත කර, යතුරු පුවරුවෙන් අකුරෙන් අකුර ටයිප් කළ යුතුය. පරිගණකය හුදෙක් ගොළු මෙවලමකි.

නව ක්‍රමය (Industry 5.0): ඔබ පරිගණකයට පවසන්නේ ඔබේ අරමුණ පමණි. "ලබන සතියේ නිවාඩු ඉල්ලා මගේ ප්‍රධානියාට යැවීමට ලිපියක් සකසන්න." එවිට AI තාක්ෂණය විසින්ම සුදුසු වචන තෝරාගෙන, ලිපිය සකසා, එය ඔබට පෙන්වා, ඊමේල් කිරීමට ද සූදානම් කරනු ඇත.

මෙතැනදී පරිගණකය 'මෙවලමක්' නොවී, ඔබේ වැඩට උදව් වන 'සගයෙකු' හෝ 'නියෝජිතයෙකු' බවට පත්ව ඇත.

මෙම පස් වැනි කාර්මික විප්ලවය අදියර තුනකින් (The Three Phases) ලෝකය අතික්‍රමණය කරන අතර, මෙම වෙනස එක රැයකින් සිදුවන්නක් නොවේ. එසේම පසුගිය කාර්මික විප්ලව මෙන් ලෝකයම ආවරණය කිරීමට දශක ගණනාවක් ගතවන්නක්ද නොවේ.

I අදියර: සිතන මොළය (Generative AI) | 2022–2024

සිදුවූ දේ: ChatGPT, Claude, Llama වැනි AI මාදිලිවල ආගමනය.

හැකියාව: මින් පෙර මිනිසුන්ට පමණක් හැකි වූ "නිර්මාණාත්මක දේ" කිරීමට යන්ත්‍රවලට හැකි විය. කවි ලිවීමට, චිත්‍ර ඇඳීමට, සහ කේත (Code) ලිවීමට ඊට හැකි විය.

අඩුව: එයට අත් පා නොතිබුණි. එයට කළ හැකි වූයේ තිරය මත අකුරු හෝ රූප මැවීම පමණි. ඊමේල් එකක් ලිවීමට ඊට හැකි වුවත්, "Send" බොත්තම එබීමට ඊට නොහැකි විය.

II අදියර: ක්‍රියාත්මක කරන දෑත් (Agentic AI) | 2025–2026 (වර්තමානය)

සිදුවන දේ: "සිතන මොළයට" අපි දැන් "ඩිජිටල් දෑත්" ලබා දී ඇත.

හැකියාව: මෙය "නියෝජිත AI" (Agentic AI) ලෙස හැඳින්වේ. මෙම AI එකට ඔබේ පරිගණකයේ මවුස් (Mouse) එක හැසිරවීමට, වෙබ් අඩවි වලට පිවිසීමට සහ මෘදුකාංග (Excel, CRM) භාවිතා කිරීමට පුළුවන.

උදාහරණයක්: පෙරදී ඔබ සංචාරයක් සැලසුම් කරන විට ගුවන් ටිකට්පත් සෙවීම, හෝටල් වෙන් කිරීම ඔබම කළ යුතු විය. නමුත් දැන් "නියෝජිත AI" එකට ඔබේ අයවැය (Budget) පැවසූ විට, එයම අන්තර්ජාලය පීරා ලාබදායී ටිකට්පත් සොයා, හෝටල් වෙන් කර, ඔබේ දින දර්ශනයට (Calendar) එය ඇතුළත් කරනු ඇත.

III අදියර: වැඩ කරන ශරීරය (Robotic AI) | 2027 සිට ඉදිරියට

සිදුවන දේ: ඩිජිටල් ලෝකයේ සිටි බුද්ධිමත් AI නියෝජිතයා, භෞතික ලෝකයට පැමිණීම.

හැකියාව: ඉහත කී "සිතීමේ හැකියාව" සහ "වැඩ කිරීමේ හැකියාව", ඇවිදින රොබෝවරුන් (Humanoid Robots) වෙත ලබා දීමයි.

වෙනස: සාම්ප්‍රදායික රොබෝවරුන් වැඩ කළේ කර්මාන්තශාලාවල වැටවල් ගසා වෙන් කළ කොටු තුළය. නමුත් මෙම නව රොබෝවරුන්ට (Tesla Optimus වැනි) සාමාන්‍ය මිනිසුන් ගැවසෙන පරිසරයක, බඩු ඔසවමින්, පිරිසිදු කරමින්, මිනිසුන් සමඟ එකට වැඩ කිරීමට හැකි වනු ඇත.

අනාගතය දෙස බැලීම

ඉදිරි වසර කිහිපය තුළ තාක්ෂණය ගමන් කරන දිශාව ඉතා පැහැදිලිය.

තිරයන් අතුරුදහන් වීම: පරිගණක තිරයේ ඇති සංකීර්ණ මෙනු (Menus) සහ බොත්තම් (Buttons) මිනිසුන්ට තවදුරටත් අවශ්‍ය නොවනු ඇත. මන්ද, එම බොත්තම් ඔබන්නේ ඔබ නොව ඔබේ AI සහායකයා (Agent) බැවිනි.

ශ්‍රම හිඟයට විසඳුම්: ලෝකය පුරා පවතින වැඩ කරන ජනගහනය අඩු වීමේ ගැටලුවට (Labor shortage), මෙම නව රොබෝ තාක්ෂණය විසඳුම් ගෙන එනු ඇත.

අවසාන වශයෙන් කල්පනා කල යුත්තේ මෙසේය. අප දැන් ගමන් කරමින් සිටින්නේ "ටයිප් කරන" හෝ "ක්ලික් කරන" යුගයෙන්, "මෙහෙයවන" (Managing) යුගයකටයි. අනාගතයේ දක්ෂයා වනුයේ වේගයෙන් වැඩ කරන පුද්ගලයා නොව, තමන්ට අවශ්‍ය දේ (Intent) මෙම AI සහායකයින් ලවා නිවැරදිව කරගන්නේ කෙසේදැයි දන්නා පුද්ගලයායි.